من علامات الثقة بالنفس

 علامات الثقة بالنفس 

من سناب: أ.باسمة الكوس

متابعة كريمة سألتني عن الثقة بالنفس و قوة الشخصية و كتبت لها هذه الإجابة :

الناس لما يقولون ( شخصيتها قوية ) يختلفون في المعنى، لكن المعنى الصحيح هو الثقة بالنفس وتقبلها وعدم السماح للآخرين بتعدي حدودهم والمعنى المنتشر وهو الخطأ : التعدي على الآخر، الرد بأسلوب جاد عدم احترام الآخر اللي بقلبي أقوله والجدال ورد الكلمة بعشر.

علامات الثقة بالنفس : 

– الرضا والقبول بالذات بالشكل والأصل واللون والوضع الاجتماعي وكل ما لا يمكن تغييره .

 – عدم لبس قناع يخفي الحقيقة.

 – شعورك من داخل انك مرتاحة من نفسك ما عندك شكوك تجاه ذاتك ولا تقللين من شأن نفسك.

 – ما عندك شك بالآخرين وسوء ظن وحساسية مفرطة .

ومن علامات الثقة بالنفس:

 – عدم تضخيم كلام الناس ، ما تقلبين كلامهم وتفكرين فيه وتحللينه وتعیشین ایام وليالي تفكرين  ليش .. وشحقه وشلون .. لين ينقمت قلبج

 – تسوين اللي بخاطرج وما يغضب ربج ويتوافق مع قيمج ومبادئج مو تسوين اللي الناس تبيه منج عشان ترضينهم ولا تسمعين منهم انتقاد.

تقول صاحبة السؤال : في ناس تقولي شخصيتج ضعيفة أو أنت مو واثقة بنفسك و أنا ما أحس بهالشي 

الجواب : – الناس مالهم حق يقولون لك هالكلام – والثقة بالنفس اللي يقصدونها شنو ؟ هل هي القوة والعدوانية والرد على الناس ؟ واللي يدوس على طرفي يا ويله ؟ واللي يرشني بالماي أرشه بالدم؟

ومن علامات الثقة بالنفس :

 -انج تحبين نفسج وتتقبلين كل شي فيها وما عندج خوف ان الناس ترفضج وتعيب عليج، تلبسين اللي يلوق عليج وتتزينين بطريقتج، ما تجبرين نفسج على شي عشان الهبة والموضة .. تكونين مرتاحة وتاخذين الشور أحيانا بس غصب.

ومن علامات الثقة بالنفس : 

– تلبسين اللبس وتطلعين للناس بالشكل اللي تحبينه وتحسينه حلو وما يخالف الذوق، ولا يلفت الانتباه.

ومن علامات الثقة بالنفس :

 – ما تجلدين نفسج بالافكار السلبية وتحطمينها بالنقد وتطالبينها بالكمال، وتشيلين هم الدنيا على ظهرج.

ومن علامات الثقة بالنفس :

 – یکون لج رایج الشخصي في امورك الشخصية ولا تنقادين للآخرين، يعني : ما تستسلمين للناس وانت من داخل متحطمه

 – تختارين اللي تبينه بدون ما تأذين نفسج أو غيرج

لا تحطين لنفسج شروط قاسية للجمال والمظهر ولا تقارنین نفسج بالمشاهير كل شخص له حياته واكثرهم يصورون بطريقة تظهرهم اجمل من الحقيقة وغير هذا مو واثقين من نفسهم وسوو تجميل وغيروا بخلقة رب العالمين.

عدلي نظرتج للحياة : الحياة صعبة ، الله قال ( لقد خلقنا الانسان في كبد ) لا تتوقعين كل شي يكون سهل وتمر الأمور والعلاقات بدون خلافات، عشان ما تنصدمين، الحياة فيها خير وشر، صحة ومرض، تعب وراحة جوع وشبع ، غنی وفقر .. مافي حياة كاملة.

خففي على نفسج: لا تفكرين واید وتلومين نفسج والناس والظروف . كوني ذكية وتحركي ونظمي حياتج وانشغلي بالحركة والتخطيط وتنمية المهارات والعبادة بدلا من ( المعارك الداخلية ) البايخة.

الموضوع كبير حيل، ليش ؟ لأن له أسباب عميقة وهي نظرتج لنفسج وصورة الذات عندج وهذا يحتاج عدة ارشادات وخطوات ودورة تشافي رائعه جداً وراح تساعدج واااايد.

اترك تعليقا

لن يتم نشر عنوان بريدك الإلكتروني. الحقول الإلزامية مشار إليها بـ *

انتقل إلى أعلى